ភ្នំពេញ៖ រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិនៃកម្ពុជា និងជាប្រេសិតពិសេសអាស៊ាន លោកឧបនាយករដ្ឋមន្រ្តី ប្រាក់ សុខុន មានប្រសាសន៍ថា បញ្ហាមីយ៉ាន់ម៉ាដែលស្មុគស្មាញជាងគេគឺមានរដ្ឋច្រើន ដែលទាមទារការអត់ធ្មត់ និងអភិក្រមមូយនឹងមានភាពជាក់ស្តែងនិយម

ថ្លែងក្នុងសន្នីសិទសារព័ត៌មានបន្ទាប់ពីកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅរសៀលនេះ លោក ប្រាក់ សុខុន ឱ្យដឹងថា លោកគ្រោងនឹងធ្វើទស្សនកិច្ចជាផ្លូវការលើកដំបូងទៅកាន់ប្រទេសមីយ៉ាន់ម៉ាដើម្បីជួបភាគីពាក់ព័ន្ធនៃជម្លោះប្រទេសនេះនៅពាក់កណ្ដាលខែមីនា ឆ្នាំ២០២២ ខាងមុខ ដោយមានជួបជាមួយភាគីពាក់ព័ន្ធ ឥស្សរជនមួយចំនួន ជាពិសេសជួបជាមួយឯកអគ្គរាជទូតអាស៊ានទាំងអស់នៅទីក្រុងយ៉ាំងហ្គូន។

លោកបានបន្តថា៖ «នឹងមានជំនួបជាមួយនឹង ឯកអគ្គរាជទូតអាស៊ានទាំងអស់នៅទីក្រុងយ៉ាំងហ្គូន ព្រោះអ្នកនៅទីនោះគេដឹងសភាពការណ៍ គេអាចមានជាយោបល់ដើម្បីឱ្យយើងធ្វើការវាយតម្លៃឱ្យបានត្រឹមដើម្បីឱ្យដឹងពីការទាមទារបស់ភាគីម្ខាងៗ»។

លោកបានបន្តថា៖ «ជាប្រេសិតខ្ញុំមើលថា ក្នុងមួយឆ្នាំនេះអាចសម្រេចអីបានខ្លះពី កុងសង់ស៊ីសទាំង៥ ចំណុចរបស់អាស៊ាននេះ»៕